Sberlada al sol, la me canzon
se perde tra i momenti del gnente,
nel sofegon e nei repetoni
de ‘na caena che strenze e incioda
la volontà de essar mi.
Ghe son anca mi? No so!
Ghe xe la machina, ghe xe le ore
strucae su tre metri de vita
consumada a comando.
Ore brusae da l’angossa che copa
i minuti incatramai del me pensar.
Ora frede nel suòr amaro.
Ghe son anca mi? No so!
I numari che parla co’ xe sera
i parla de un granel che ‘l vento
ga tamissà secondo i so’ caprissi.
Machina e produssion
conta de più par la storia del mondo.
Ghe son anca mi? Non so!…
un fià de pan lo go stasera.
-Alberto Albanese Junior
