Ghe xe el sol, ghe xe l’ombra
nel cortivo-ostaria dove i magna.
El sol taia le foiete de la pergola
dove che magna el prete tondo
co’ dodese vecioti torno.
EL sol fiaco de otobre taia l’ombra pian, ‘na caressa.
I discore pian a l’ombra, al sol
che bate sui piteri de fiori picai col fil de fero
soto i copi bassi del pòrtego.
Tuti xe quaci, i màstega pian.
Tuto xe bon.
I dise sotovoçe che xe meio contentarse e poco,
vìvar co’ poco.
Ma un toso là viçin, in blugin
che magna in pressa
fa ‘na smorfia e tase.
(El xe pitor, ma ancùo le bele màcie
sui muri torno, no ghe dise gnente).
Ghe xe anca ‘na tòla ptreparanda co’ la tovaia bianca, posae, bicieri.
El sol la scalda par quei che vegnarà.
Ghe xe el sol, ghe xe l’ombra
e do fonghetti co’ l’ombrelin xe nati
ne la sfesa tra do lastre rote de piera,
soto ‘na carega ne l’ombra, nel sol, pian,
soto ‘na carega, de Otobre.
–Ernesto Calzavara
