Quando go un qualche afar che me va storto,
o pur so’ cargo de malinconia
su le to rive porto ‘l me sconforto:
cussì che i me pensieri svola via.
Spece co’ xe sul tardi che xe morto
ogni rumor, che me disturbarìa
cascate e cascatee me da conforto
co’ musiche che xe ‘na sinfonia.
Se po ghe xe la luna, e te rifleti
su l’onda crespa i ragi inarzentai
te ga l’aspeto del cristalo franto.
Passo, co’ son co’ ti, momenti chieti
che sfranta dal me cuor pensieri e guai
tra musiche e riflessi eterno incanto.
-Alberto Albanese Senior
