Se mi te lo disesse per davero
che se te go darente sero ‘l fren
e che mai posso dirte par intiero
che me go acorto mi go da frenar?
Se te disesse: quando i to ocioni
me varda fisso te me fa incantar
e ‘l cuor el me fa çerti rabaltoni
che sfadigando mi go da frenar?
E se… senza pensarghe tanto sora
molasse ‘l frn che scota come ‘l fogo
e i scrupoli mandasse a la maora
e al me gran desiderio dasse sfogo?
E subito, de’ paca, sul momento
quà streta sul me cuor mi te scrucasse
e su la to bocheta (che momento!)
un forte e longo baso mi te dasse?
E in fin se mi… no posso dirla s-cieta:
dime: cossa dirissitu, Nineta?
–Alberto Albanese Senior
