La vita te la tiremo avanti a rate,
co’ sta pagheta tanto smilza e seca;
co i debiti e i pensieri se combate
tanto che par rivarghe filo in steca.
Ma la passiensa mi la go da frate,
e a tutto passo sora, co’ la meca;
e me contento ancora se go late
e polentina, inveçe de bisteca.
Sarìa contento, de aver anca manco
de quel che go; de lavorar per çento
e zorno e note, no’ sarìa mai stanco.
Che’ tuto questo passa in te un momento,
se mi te go vissin, streta al me fianco;
perchè solo ‘l to ben me fa contento.
–Alberto Albanese Senior
