Piove su la laguna inmusonada,
grisa come i pensieri -de chi no ga palanche
sora le barche stanche
che torna verso Cioza, indormenzada.
Piove sora i canali e le barene,
vanèse senza fiori -nere vanèse morte,
su le brìcole storte
carghe de ani e carghe de caène.
Piove su burci e sora le tartane,
sora le cofe vode -sora le rede flosse,
se ricama de giosse
i Santi e le Madonne se le alzane!
Quanta malinconia! Se sente solo
el s’ciafisar de l’acqua -su le barche, sui pali,
el çigo dei cocàli
che no se fida de ciapar el svolo!
Quanta malinconia! Drento un batelo
vorave destirarme -solo col me’ tormento,
e andar, portà del vento,
al largo, dove l’acqua bagna el çielo,
andar fin l dove finisse el mondo,
dove el sol xe sparìo -par sempre, geri sera,
desmentegar la tera
e lassarm calar fin zoso, in fondo.
In fondo, dove soli, abandonai
ne la pase dei boni -ne la luse dei forti,
nel mistero dei morti,
riposa quei che no xe più tornai!
–Giorgio Cedolin
