A chi na stomegad
de tuto,
a chi na çercada
de gnente,
a la pora zente
un sangiuto
de zorni da cani,
a chi çento ani
a chi tre,
chi nasse todeschi
chi taliani,
o che i pianze da re
o che i ride da vilani
condanai fin che i mora
a star fora
col suto e co scaliva.
Pura,
chi xe che ghe intiva
-disi mai- a capirlo
sto strambèl de vita
pì mejo de lori
rabaltai
a sugarse i suori
soto un fià de gazìa
spasemada dal vento,
co la vista impinìa
de sta festa
de sol
che tuto s’un momento
ghe parecia tempesta
al concol
o sarta aqua a le ziese
conforme che vol.
Chi che fa i manegheti e le zarese?
-Enzo Demattè
