Voràve essar un àlbaro,
in una corte sconta,
in riva de un canal.
Sentir la primavera
Sentir ne le me vìssare
passar soto la scorza
el gusto de acqua e sal,
el sugo de la tera.
Sentir la primavera
passar par tuti i rami
a desmissiar le gogie
de un bel verde sluzente,
a desmissiar le vogie
de le putèle in grìngola
che me vegnisse arente.
Voràve essar un arbaro.
Sentirme in mezo ai rami
le çeleghe nel nìo;
pincolarme sul rio
a caressar le gòndole che passa,
sentir vissini i fioi che fa manbassa
zogando a zirotondo,
fregandosene del mondo!
Voràve essar un albaro.
Farghe el rutian a copie de morosi,
lassar che i tosi
co’ un ciodo o un britolin
me scortega nel legno
el solito disegno:
un cuor che sgiossa,
el zorno, el mese, l’ano,
e do nomi vissin!
Voràve essar un albaro
e passai -tuto passa- i zrni beli
e seche le raìze,
ridoto in tole
dai denti de ‘na siega prepotente,
preparar per i sòni de la zente
casse da morto lustre de vernize,
leti da sposi e cune da puteli!
-Giorgio Cedolin
